ដើរលើផ្លូវនៅជិតព្រះបរមរាជវាំង ក្នុងរាជធានីភ្នំពេញ

រាជធានីភ្នំពេញគ្រោងនឹងបើកផ្លូវដើរតាមមាត់ទន្លេនៅចុងខែមករា ឆ្នាំ២០២៥ ដែលអាជីវករខ្នាតតូចក្នុងស្រុកសង្ឃឹមថានឹងរកចំណូលបានកាន់តែច្រើនពីភ្ញៀវទេសចរ ប៉ុន្តែបានស្នើសុំឱ្យរដ្ឋាភិបាលរៀបចំកន្លែងសមរម្យសម្រាប់ពួកគេ។

លោក ឃួង ស្រេង អភិបាលរាជធានីភ្នំពេញ បានប្រាប់សារព័ត៌មាន Kiripost នៅថ្ងៃទី៦ ខែមករា ឆ្នាំ២០២៥ ថា គ្រោងនឹងបើកគម្រោងផ្លូវដើរ ឬ “walking street” របស់រាជធានីភ្នំពេញ តាមបណ្ដោយមាត់ទន្លេ ចាប់ពីប៉ុស្តិ៍ប្រៃសណីយ៍ រហូតដល់ព្រះបរមរាជវាំង នៅចុងខែមករា ឆ្នាំ២០២៥ ខាងមុខនេះ។ ផ្នែកមួយនៃគម្រោងនេះ គឺមានគោលបំណងផ្លាស់ប្តូរតំបន់នេះទៅជាគោលដៅទេសចរណ៍។ គម្រោងលើផ្ទៃដី ៥៧ ហិកតា នឹងរួមបញ្ចូលតំបន់អាហារ និងទិញទំនិញ តំបន់វប្បធម៌ និងតំបន់ច្នៃប្រឌិត ក៏ដូចជាកន្លែងបៃតងផងដែរ ហើយនឹងបើកសម្រាប់តែអ្នកថ្មើរជើងប៉ុណ្ណោះពីថ្ងៃសុក្រ ដល់ថ្ងៃអាទិត្យ ចន្លោះម៉ោង ៦ល្ងាច ដល់ម៉ោង ១១យប់។

លោកអភិបាលបានមានប្រសាសន៍ថា៖ «យើងនឹងបិទតំបន់នេះ [សម្រាប់ចរាចរណ៍] រយៈពេលបីថ្ងៃក្នុងមួយសប្តាហ៍ ចាប់ពីល្ងាចថ្ងៃសុក្រ រហូតដល់ថ្ងៃអាទិត្យ និងនឹងបើក [សម្រាប់ចរាចរណ៍] នៅព្រឹកថ្ងៃច័ន្ទ»។

លោកបន្ថែមថា ការដាក់ឱ្យដំណើរការផ្លូវដើរនឹងប្រព្រឹត្តទៅនៅចុងខែ ប៉ុន្តែការអភិវឌ្ឍមិនទាន់ត្រូវបានបញ្ចប់នៅឡើយទេ ហើយនឹងត្រូវធ្វើបណ្តើរៗ។ លោកបានពន្យល់ថា៖ «យើងមិនទាន់ត្រៀមខ្លួនរួចរាល់នៅឡើយទេ យើងគ្រាន់តែធ្វើការដើម្បីឱ្យប្រជាជនមានទម្លាប់ដើរ និងបិទចរាចរណ៍ដើម្បីការពារកុំឱ្យរថយន្តចូលក្នុងតំបន់នេះ» ដោយលោកបានបន្ថែមថា នៅជុំវិញតំបន់នេះ ការដឹកជញ្ជូនទាំងអស់នឹងត្រូវបិទ រួមទាំងកង់ និងស៊ីក្លូផងដែរ។

លោក ញឹក ផល្លា អាយុ ២៧ ឆ្នាំ អ្នកលក់ខ្យងនៅក្បែរព្រះបរមរាជវាំង បានប្រាប់ Kiripost ថា លោកមានអារម្មណ៍រំភើបនៅពេលបានដឹងអំពីគម្រោងនេះ ហើយរំពឹងថានឹងមានការកើនឡើងនៃចំនួនលក់ ដោយសារគម្រោងនេះនឹងនាំមកនូវភ្ញៀវទេសចរកាន់តែច្រើនដែលនឹងដើរទិញម្ហូប និងទំនាក់ទំនងជាមួយអ្នកលក់កាន់តែច្រើន មិនដូចពេលដែលពួកគេគ្រាន់តែបើកបរឆ្លងកាត់នោះទេ។

លោក ផល្លា បានលក់ខ្យងអស់រយៈពេលជាងប្រាំឆ្នាំមកហើយ ដោយចាប់ផ្តើមពីម៉ោង ២ រសៀល រហូតដល់ម៉ោង ៤ ទៀបភ្លឺ ដោយរកបានប្រហែល ២០ ដុល្លារក្នុងមួយថ្ងៃ។ លោកសង្ឃឹមថានឹងរកប្រាក់បានកាន់តែច្រើនបន្ទាប់ពីគម្រោងនេះចាប់ផ្តើម។ លោកបន្ថែមថា៖ «ខ្ញុំសប្បាយចិត្ត ព្រោះពេលដែលមនុស្សដើរ ពួកគេនឹងទិញច្រើន។ នៅពេលពួកគេបើកបរ ពួកគេមិនសូវទិញអ្វីនោះទេ។ ពេលដែលពួកគេដើរ ពួកគេនឹងទាក់ទងជាមួយអ្នកលក់អាហារ ហើយការលក់ក៏នឹងកើនឡើងផងដែរ»។

ទោះជាយ៉ាងណាក៏ដោយ លោក ផល្លា បានស្នើសុំឱ្យរដ្ឋាភិបាលរៀបចំកន្លែងសមរម្យ និងយុត្តិធម៌សម្រាប់អ្នកលក់ ធ្វើឱ្យវាកាន់តែងាយស្រួលសម្រាប់ពួកគេក្នុងការលក់ពីក្នុងស្តង់ ព្រោះបច្ចុប្បន្នលោកលក់ពីក្នុងរទេះរបស់លោកដែលរើពីកន្លែងមួយទៅកន្លែងមួយ។ លោកបន្តថា៖ «ពេលខ្ញុំរើ ពិបាកសម្រាប់អតិថិជនក្នុងការរកខ្ញុំឃើញ»។

អាជីវករលក់អាហារតាមផ្លូវម្នាក់ទៀតដែលបានបញ្ចេញឈ្មោះត្រឹម សិលា ជាអ្នកលក់បាយឆា និងមីឆា បាននិយាយថា លោកកំពុងរង់ចាំមើលលទ្ធផលជាក់ស្តែងទាក់ទងនឹងចំនួនភ្ញៀវទេសចរ ដែលនឹងកើនឡើងប្រសិនបើការរៀបចំត្រូវបានធ្វើបានល្អ។ លោកបានបន្ថែមថា៖ «វាអាស្រ័យលើការរៀបចំដោយអភិបាលខណ្ឌ។ ប្រសិនបើមានភ្ញៀវទេសចរកាន់តែច្រើន ហើយអភិបាលរៀបចំទីតាំងសមរម្យសម្រាប់យើងលក់ ខ្ញុំគិតថាវានឹងល្អ»។

លោក សិលា បានលើកឡើងថា កាលពីប៉ុន្មានឆ្នាំមុន លោកធ្លាប់រកបានប្រហែល ១០០ ទៅ ១២០ ដុល្លារ ប៉ុន្តែឥឡូវនេះ លោកស្ទើរតែរកបានត្រឹមតែ ៧៥ ដុល្លារក្នុងមួយថ្ងៃប៉ុណ្ណោះ មិនទាន់រាប់បញ្ចូលការចំណាយទេ។

ទាក់ទងនឹងកំណើនអាជីវកម្ម លោក ស្រេង បានមានប្រសាសន៍ថា បច្ចុប្បន្ននេះ អ្វីដែលសំខាន់គឺការបង្កើតកន្លែងដែលមានសុវត្ថិភាពសម្រាប់ប្រជាជនដើរ ហើយការជួយអាជីវកម្មក្នុងស្រុកឱ្យរីកចម្រើនគឺជាជំហានមួយផ្សេងទៀតដើម្បីមើលលទ្ធភាព។ លោកបន្ថែមថា៖ «វិធីដែលយើងអាចរៀបចំបាន គឺយើងចង់ជួយ ប៉ុន្តែយើងត្រូវមើលលទ្ធភាពថាតើយើងអាចជួយបានដោយរបៀបណា»។